ᑲᑕᒑᕆᕝᕕᒃ 2024
ᑎᑎᕋᖅᑐᖅ ᒫᑎᓴᓐ ᕚᓐᑳᒻᑉ
ᑲᓇᑕᐅᑉ ᐅᑭᐅᖅᑕᖅᑐᖓ ᐊᖏᔪᒻᒪᕆᐅᔪᖅ ᐊᒻᒪᓗ ᐊᔾᔨᐅᖏᑦᑑᑉᓗᓂ. ᐃᓄᖏᑦ ᐊᑉᓯᒪᐅᖅᑑᒐᓗᐊᑦ, ᐊᖏᕐᕋᕆᔭᐅᔪᖅ ᐊᒥᓱᓄᑦ ᓄᓇᓕᖕᓄᑦ, ᐃᓚᐅᓪᓗᓂ ᒥᑦᑎᒪᑕᓕᒃ. ᒥᑦᑎᒪᑕᓕᒃ ᐊᖏᓛᖑᔪᖅ ᓄᓇᓕᖕᓂᑦ ᐅᐊᖕᓇᖅᐸᓯᖓᓃᑦᑐᓂᑦ ᐱᖓᖕᓇᖅᐸᓯᖓᑦᑑᓂᑦ ᕿᑭᖅᑖᓗᖕᒥᑦ ᓄᓇᕗᒻᒥᑦ. ᖃᐅᔨᒪᔭᐅᔪᖅ “ᐱᑦᑕᐅᑦᑎᐊᖅᑐᖅ ᐅᑭᐅᖅᑕᖅᑐᒥᑦ” ᖃᖅᖃᓂᒃ ᖃᓂᑖᓃᑦᑐᖃᐅᕐᓗᓂ, ᓯᕐᒥᓂᑦ ᐊᒻᒪᓗ ᓂᕐᔪᑎᑕᖃᐅᕐᓗᓂ. ᑕᐃᑲᓂ ᐅᔭᕋᑦᑎᐊᕙᒃᑕᖃᐅᕐᒥᔪᖅ ᐊᒻᒪᓗ ᑲᓇᑕᐅᑦ ᐅᐊᖕᓇᖅᐸᓯᓛᖓᓃᑦᑐᒥᑦ ᐅᔭᕋᒃᑕᕆᐊᖃᖅᑐᖅ. 160 ᑭᓛᒥᑕᓂᒃ ᓂᒋᐊᓂᑦ ᐅᖓᓯᒃᑎᒋᔪᖅ ᒥᑦᑎᒪᑕᓕᖕᒥᑦ, ᓄᓘᔮᓂᑦ ᐅᔭᕋᒃᑕᕆᐊᖅ ᐊᐅᓛᓕᖅᑐᖅ ᑕᐃᒪᙵᓂᑦ 2014-ᒥᑦ ᓄᓇᕐᔪᐊᕐᒥᑦ ᖁᑦᑎᓛᒃᑯᑦ ᐱᑦᑕᐅᓂᖃᖅᑐᓂᒃ ᑕᐃᑲᙵᑦ ᐊᐅᓪᓚᖅᑎᑕᐅᖃᑦᑕᖅᑐᓂᒃ ᑎᒥᕈᖅ ᓴᕕᒃᓴᓂᒃ.
ᒥᑦᑎᒪᑕᓕᒃ - ‘ᐃᓂᐅᔪᖅ ᒥᑦᑕᕐᕕᖃᕐᓗᓂ’ - ᒥᑭᑦᑐᖅ, ᐃᓄᐃᓐᓇᕐᓚᖕᓂᑦ ᐃᓄᖃᖅᑐᖅ ᓄᓇᓕᒃ ᕿᑭᖅᑖᓗᖕᒥᑦ ᓄᓇᕗᒻᒥᑦ, ᑲᓇᑕ. ‘ᐱᑦᑕᐅᑦᑎᐊᖅᑐᖅ ᐅᑭᐅᖅᑕᖅᑐᒥᑦ’ 644 ᑭᓚᒥᑕᓂᒃ ᖁᓖᖓᓃᑦᑐᖅ ᑭᒡᓕᒋᔭᐅᔪᒥᑦ ᐅᑭᐅᖅᑕᖅᑐᒧᑦ.
ᐳᔪᖃᑖᒃ ᓄᖅᖃᖅᑎᓪᓗᒍ
ᐅᑭᐅᑦ ᐊᓂᒑᓵᖅᑐᓂᑦ, ᐱᖅᖁᓯᖏᑦᑎᒍᑦ ᓄᓇᒥᒃ ᐊᑐᖃᑦᑕᖅᑐᑦ ᐅᔭᕋᒃᑕᕆᐊᑉ ᖃᓂᑖᒍᑦ ᖃᐅᔨᖃᑦᑕᖅᑐᑦ ᓄᓇ ᐊᓯᐊᙳᕐᓂᖓᓂᑦ, ᐃᓚᐅᓪᓗᑎᒃ ᑲᓚᖃᓕᖅᓯᒪᔪᑦ ᐊᐳᑎ ᐊᒻᒪᓗ ᓯᑯᐃᑦ, ᐱᒻᒪᕆᐅᒋᔭᐅᔪᖅ ᐃᒪᖅᑖᕐᕕᐅᖃᑦᑕᕐᓗᑎᒃ ᐅᑭᐅᒃᑯᑦ. ᐃᓱᒫᓘᑎᖃᖅᑐᑦ ᑲᓚᖃᓕᖅᑎᑕᐅᖕᒪᑦ ᐳᔪᖃᑖᖕᒧᑦ ᐅᔭᕋᒃᑕᕆᐊᓕᕆᓂᕐᒥᑦ ᐱᔪᓂᒃ, ᓲᕐᓗ ᖄᖅᑎᕆᓂᕐᓂᑦ, ᐅᓯᔭᐅᔪᑦ ᐊᒡᔭᖅᑐᖅᑕᐅᓂᖏᓐᓂᑦ ᐊᒻᒪᓗ ᑲᑎᑕᐅᔪᓂᑦ ᑎᒥᕈᖅ ᓴᕕᒃᓴᖅ.
ᐳᔪᖃᑖᒃ, ᑕᒫᓂᖅᖠᖅᑑᓂᕋᖅᑕᐅᔪᖅ ᐳᔪᖃᑖᒃ, ᐊᕙᑎᒧᑦ ᐱᑎᑦᑎᓂᖃᕈᖕᓇᖅᑐᖅ, ᐱᓗᐊᖅᑐᒥᑦ ᐃᒃᐱᒋᓴᕋᐃᑦᑐᓂᑦ ᐱᕈᖅᐸᓪᓕᐊᓂᖃᖃᑎᒌᒃᑐᓂᑦ ᐅᑭᐅᖅᑕᖅᑐᑐᑦ. ᑐᑭᓯᐊᓂᖅᓴᐅᓂᐊᕐᓗᒍ ᖃᓄᐃᓕᐅᖅᐸᓪᓕᐊᓂᐅᔪᖅ ᐅᐊᖕᓇᖅᐸᓯᖓᓂᑦ ᐱᖓᖕᓇᖅᐸᓯᖓᓂᑦ ᕿᑭᖅᑖᓗᖕᒥᑦ, ᑲᓇᑕᒥᑦ ᓄᓇᒥᑦ ᐱᕝᕕᐅᖃᑦᑕᖅᑐᓂᒃ ᖃᐅᔨᓇᓱᒃᑐᓕᕆᔩᑦ ᐱᓕᐸ ᕼᐊᓐᑦᔅᒪᓐ, ᓘᒃᑖᖅ CanmetMINING-ᑯᓐᓂᑦ ᐊᒻᒪᓗ ᐱᓕᐸ ᕼᐊᓐᑦᔅᒪᓐ, ᓘᒃᑖᖅ of CanmetMINING and H. ᐲᑕ ᐅᐊᐃᑦ, ᓘᒃᑖᖅ ᑲᓇᑕᒥᑦ ᓄᓇᙳᐊᓕᐅᕆᕝᕕᒃ ᐊᒻᒪᓗ ᓄᓇᕐᔪᐊᕐᒥᑦ ᖃᐅᔨᓴᐃᕝᕕᖕᒥᑦ ᐊᒻᒪᓗ ᐃᖅᖃᓇᐃᔭᖅᑎᖏᑦ ᐃᓚᐅᓪᓗᑎᒃ ᓘᒃᑖᙳᒃᓴᔪᖅ ᐃᓕᓴᖅᑎ ᐄ ᑭᓖᕗ, ᐋᖅᕿᒃᓱᐃᔪᑦ ᐊᑐᖅᑕᐅᓂᐊᖅᑐᒥᒃ ᑕᒪᐃᓐᓅᖓᔪᒥᑦ ᐊᑐᖅᑕᐅᔪᖕᓇᖅᑐᓂᒃ ᖃᐅᔨᓴᕐᓂᐊᕐᓗᒍ ᐳᔪᖃᑖᒃ ᐅᑭᐅᖅᑕᖅᑐᒥᑦ.
ᖃᐅᔨᒋᐊᕐᕕᐅᓂᖏᑦ ᓄᓇᓕᒃ
ᖃᐅᔨᓴᐃᔪᑦ ᖃᓂᑕᓗᐊᖓᓂᑦ ᓄᓘᔮᓂᑦ ᐊᒻᒪᓗ ᐱᓕᕆᖃᑎᒋᔭᐅᔪᑦ ᓄᓘᔮᓂᑦ ᐅᔭᕋᒃᑕᕆᐊᓕᕆᔨᒃᑯᑦ (BIMC) ᖃᐅᔨᓴᕐᓂᐊᕐᓗᒍ ᐱᔾᔪᑕᐅᔪᖅ ᐊᒻᒪᓗ ᐆᒃᑐᕋᕐᓗᒋᑦ ᐊᔾᔨᒌᙱᑦᑐᑦ ᐳᔪᖃᑖᑦ ᑲᑎᑕᐅᔪᑦ ᐊᒻᒪᓗ ᖃᐅᔨᓂᕐᒧᑦ ᐊᑐᖅᑕᐅᔪᑦ. ᑐᕌᒐᕆᔭᖓᑦ ᐱᐅᓯᒋᐊᕈᒪᓪᓗᒍ ᐅᔭᕋᒃᑕᕆᐊᕐᒥᙶᖅᑐᓂᑦ ᐳᔪᖃᑖᒥᒃ ᖃᐅᔨᓴᐃᓂᖅ ᐊᒻᒪᓗ ᓇᓚᐅᑦᑖᖅᑕᐅᔪᑦ ᐊᒃᑐᖅᓯᓂᖃᖅᑐᒥᒃ ᖃᐅᔨᓴᐃᓂᕐᓄᑦ.
“ᐱᐅᓯᒋᐊᕈᒪᔭᕗᑦ ᐊᑐᖅᑕᐅᖃᑦᑕᖅᑐᑦ ᐅᔭᕋᒃᑕᕆᐊᓕᕆᔨᓄᑦ ᖃᐅᔨᓴᕐᓂᐊᕐᓗᒋᑦ ᐊᒻᒪᓗ ᖃᓄᐃᑦᑑᖓᓂᖏᓐᓂᑦ ᐳᔪᖃᑖᒃ, ᐊᒻᒪᓗ ᐱᓕᕆᖃᑎᖃᕐᒥᔪᒍᑦ ᓄᓇᓕᖕᒥᐅᓂᑦ ᐱᓕᕆᐊᕆᓂᐊᕐᓗᒋᑦ ᐊᐱᖅᖁᑎᒋᔭᖏᑦ,” ᐅᖃᖅᑐᖅ ᐱᓕᐸ. ᐱᓕᕆᖃᑎᒋᓗᒋᑦ ᓄᓇᓕᖕᒥᐅᑕᐃᑦ ᐊᒻᒪᓗ ᐅᔭᕋᒃᑕᕆᐊᓕᕆᔨᒃᑯᑦ ᐊᑐᓂ ᐱᓕᕆᐊᕐᒥᑦ ᓇᓃᓐᓂᕆᔭᖏᓐᓃᑎᓪᓗᒋᑦ ᐃᓗᐃᑦᑐᒥᒃ ᐊᒻᒪᓗ ᐱᒻᒪᕆᐅᔪᒥᒃ ᑐᑭᓯᐊᓂᖅᑖᖅᑎᑦᑎᓂᐊᖅᑐᖅ ᐱᔾᔪᑕᐅᔪᒥᑦ.
ᐱᒋᐊᓚᐅᖅᑕᖓᑦ ᐱᓕᕆᐊᖅ ᑲᑎᒪᑎᑦᑎᖃᑦᑕᕐᓗᑎᒃ ᐊᒻᒪᓗ ᐃᓕᓴᐃᓪᓗᑎᒃ ᒥᑦᑎᒪᑕᓕᖕᒥᑦ ᑐᓴᕐᓂᐊᕐᓗᒋᑦ ᓄᓇᓕᖕᒥᐅᓄᑦ ᐃᓱᒪᒋᔭᐅᔪᑦ ᐳᔪᖃᑖᒧᑦ. ᐱᓕᕆᐊᒧᑦ ᐱᓕᕆᖃᑎᒌᖕᓂᖅ ᐊᔪᙱᑎᑦᑎᔪᖅ ᐱᓕᕆᔪᑦ ᓇᓕᒨᖓᑎᓐᓂᐊᕐᓗᒍ ᖃᐅᔨᓴᐃᓂᕐᒧᑦ ᑐᕌᒐᕆᔭᐅᔪᑦ ᓄᓇᓕᖕᒥᐅᓄᑦ ᐱᔭᐅᔪᒪᔪᓄᑦ, ᓈᓴᐅᑏᑦ/ᑎᑎᖅᖃᐃᑦ ᑲᑎᑕᐅᔪᑦ ᐱᓕᕆᐊᖑᓗᑎᑦ ᐊᐱᖅᖁᑕᐅᔪᒧᑦ ᓄᓇᓕᖕᒥᐅᓂᑦ ᓱᓇᑕᖃᕐᒪᖔᑦ ᐳᔪᖃᑖᖕᒥᑦ ᐊᒻᒪᓗ ᓇᒧᙵᐅᖕᒪᖔᑕ.
ᐱᑖ ᐃᖕᒥᓂᒃ ᐊᔾᔨᓕᐅᖅᑐᖅ ᐱᓕᐸ ᐃᓚᐅᓪᓗᓂ ᐊᒻᒪᓗ ᐅᐊᖕᓇᖓᓂᑦ ᕿᑭᖅᑖᓗᖕᒥᑦ ᐊᐅᓚᕈᔾᔨᔩᑦ (ᓛᓂ ᐊᕐᓇᑲᓪᓚᒃ, ᐱᓕ ᒥᖅᖁᓵᖅ, ᐄᑐᕆᐊᓐ ᐅᑦᑐᕙ ᐊᒻᒪᓗ ᓯᑏᕕᓐ ᑲᓴᕐᓇᒃ) ᒥᑦᑎᒪᑕᓕᖕᒥᑦ.
ᑕᒫᓂᖅᖠᖅᑐᖅ ᐳᔪᖃᑖᒃ
“ᑕᒫᓂᖅᖠᖅᑐᖅ” ᐳᔪᖃᑖᒃ ᐊᑎᖅᑖᖅᓯᒪᔭᖓ ᐊᓂᖅᓵᖅᑐᖅᑕᑉᑎᖕᓄᐊᖅᓯᒪᖕᒪᑦ ᒥᑭᑦᑑᑎᐅᓪᓗᑎᒃ ᐱᔭᐅᓂᖅ ᐊᔪᕐᓇᖅᑐᑦ, ᐊᔪᕐᓇᑎᑦᑎᓪᓗᓂ ᖃᐅᔨᓴᕐᓂᐊᕐᓗᒋᑦ ᐊᐅᓚᓐᓂᐊᕐᓗᒍᓘᓐᓃᑦ. ᐱᑎᑕᐅᒐᔪᒃᑐᑦ ᐱᓕᕆᕝᕕᒡᔪᐊᓂᑦ ᐊᐅᓛᖅᑎᑦᑎᓂᕐᓂᑦ, ᐊᑉᖁᓯᐅᖅᑎᓪᓗᒋᑦ, ᐃᖏᕐᕋᔭᒃᑎᓪᓗᒋᑦ ᐊᒻᒪᓗ ᐃᒻᒥᓂᑦ ᐱᔪᓂᒃ ᓄᓇᒥᒃ ᐃᓗᐃᓵᕆᓂᕐᓂᑦ. ᑕᒫᓂᖅᖠᖅᑐᖅ ᐅᔭᕋᒃᑕᕆᐊᒥᑦ ᐳᔪᖃᑖᒃ ᐱᑦᑕᐅᖏᑦᑐᖅᑕᖃᑐᐃᓐᓇᕆᐊᖃᖅᑐᖅ ᐊᔾᔨᒌᙱᑦᑑᑎᓂᒃ ᓴᕕᒃᓴᓂᒃ ᐱᑕᖃᕈᖕᓇᕐᒪᑕ, ᐊᑐᖅᖢᓂ ᓴᓇᒥᒃ ᐅᔭᕋᒃᑕᖅᑕᐅᔪᒥᑦ.
ᐳᔪᖃᑖᖕᒥᑦ ᖃᐅᔨᓴᐃᓂᖅ
ᐅᑭᐅᖅᑕᖅᑐᒥᑦ ᐳᔪᖃᑖᖕᒥᑦ ᖃᐅᔨᓴᐃᓂᖅ ᐊᔾᔨᐅᖏᑦᑐᓂᒃ ᐊᒃᓱᕈᕐᓇᖅᑐᖃᐅᖅᑐᖅ, ᐊᑐᖅᓯᒪᓂᑯᖃᕋᓗᐊᖅᑐᓄᓪᓘᓐᓃᑦ ᖃᐅᔨᓴᐃᔨᓄᑦ ᓲᕐᓗ ᐱᑖ, ᐱᓕᐸ ᐊᒻᒪᓗ ᐄᒥ. “ᐊᓯᖏᓐᓂᑦ ᑲᓇᑕᒥᑦ ᐱᓕᕆᖃᑦᑕᖅᓯᒪᔪᒍᑦ, ᑭᓯᐊᓂ ᓯᕗᓪᓕᖅᐹᖑᔪᖅ ᓄᓇᒥᑦ ᐱᓕᕆᕝᕕᒋᓯᒪᔭᑦᑎᓐᓂᑦ,” ᐅᖃᖅᑐᖅ ᐲᑕ. ᐱᓕᕆᔪᑦ ᐃᓚᓯᔪᒪᔪᑦ ᐊᔾᔨᒌᙱᑦᑐᓂᒃ ᒪᓂᕋᕐᒥᑦ ᐳᔪᖃᑖᓂᒃ ᐱᔭᐅᖃᑦᑕᕐᓂᖏᓐᓄᑦ ᐊᑐᖅᑕᐅᔪᓂᑦ, ᓲᕐᓗ ᑲᑎᑦᑎᓗᑎᒃ ᐊᐳᑎᒥᑦ ᐊᒻᒪᓗ ᑐᒃᑐᓄᑦ ᓂᕿᒋᔭᐅᔪᓂᑦ ᐆᒃᑐᕋᖅᑕᐅᓂᐊᖅᑐᓂᒃ ᐊᒻᒪᓗ ᐊᑕᕐᓗᑎᒃ ᐳᔪᖃᑖᖕᒥᑦ ᐆᒃᑐᕋᐃᔾᔪᑎᓂᑦ, ᑕᐃᔭᐅᔪᑦ ᐳᔪᖃᑖᓂᒃ ᓇᒧᙵᖅᓯᒪᓂᔪᓂᑦ ᑲᑎᑦᑎᔾᔪᑎᓂᑦ.
ᒥᑦᑎᒪᑕᓕᒃ ᐅᑭᐅᖅᑕᖅᑐᒥᑦ ᓯᓚᖃᖅᑐᖅ ᐊᑯᓂᐅᔪᒥᑦ, ᐃᒃᑮᕐᓇᖅᑑᔪᓂᒃ ᐅᑭᐅᖑᖃᑦᑕᖅᑐᓂᑦ ᐊᒻᒪᓗ ᓇᐃᑦᑐᒥᑦ, ᓂᒡᓚᓱᒃᑐᓂᒃ ᐊᐅᔭᖃᖅᑐᓂᑦ. ᐊᐅᔭᖏᑦ ᓈᒻᒪᒃᑑᔪᑦ ᑲᑎᑦᑎᓂᐊᕐᓗᓂ ᐆᒃᑐᕋᕈᑎᓂᑦ ᑎᑭᑕᐅᔪᖕᓇᖅᑐᓂᑦ ᖁᓕᒥᒎᓕᒃᑯᑦ, ᐃᓚᐅᓪᓗᑎᒃ ᐳᔪᖃᑖᓂᒃ ᑲᑎᑦᑎᔾᔪᑏᑦ ᐊᒻᒪᓗ ᐳᔪᖃᑖᓄᑦ ᐴᓂᒃ (ᑕᓕᖅᐱᒃᖠᕐᒥᑦ).
ᑕᒫᓂᖅᖠᖅᑐᑦ ᐳᔪᖃᑖᑦ ᐊᐳᑎᒧᐊᖃᑦᑕᕐᒪᑕ, ᐆᒃᑐᕋᐅᑕᐅᓂᐊᖅᑐᑦ ᑲᑎᑕᐅᖃᑦᑕᖅᑐᑦ ᐅᐱᕐᖔᒃᑯᑦ ᖃᐅᔨᓴᕐᓂᐊᕐᓗᒋᑦ ᖃᓄᑎᒋᐅᓂᖏᑦ ᐳᔪᖃᑖᒃ ᑲᑎᑉᐸᓕᐊᔪᑦ ᐅᑭᐅᖑᑎᓪᓗᒍ. ᐆᒃᑐᕋᕈᑕᐅᔪᑦ ᐃᑲᔪᕐᓂᐊᖅᑐᑦ ᓄᓇᙳᐊᓕᐅᕐᓗᑎᒃ ᐃᓂᐅᔪᒥᑦ ᓇᒧᙵᐅᓯᒪᓂᖏᓐᓂᑦ ᐳᔪᖃᑖᒃ ᐊᒻᒪᓗ ᖃᐅᔨᓗᒋᑦ ᐃᓗᐊᓃᑦᑐᑦ ᐊᒻᒪᓗ ᓱᓇᑕᖃᕐᓂᖏᓐᓂᑦ ᐃᓗᐊᓃᑦᑐᖏᓐᓂᑦ. ᑐᑭᓯᐅᒪᔾᔪᑎᐅᔪᑦ ᐃᑲᔪᖃᑦᑕᖅᑐᑦ ᑐᑭᓯᐊᓂᐊᕐᓗᒍ ᖃᓄᖅ ᐳᔪᖃᑖᓕᐅᕆᓂᖏᑦ ᐅᔭᕋᓂᑦ ᐊᒃᑐᖅᓯᖕᒪᖔᑕ ᐊᐅᓚᓂᖏᓐᓄᑦ ᐃᓚᒋᔭᐅᔪᓂᑦ ᖃᓂᑖᓃᑦᑐᓂᑦ ᐅᔭᕋᒃᑕᕆᐊᕐᒥᑦ.
ᐆᒃᑐᕋᕈᑎᓕᕆᓃᑦ ᐊᑕᐅᑦᑎᒃᑯᑦ ᐱᓕᕆᐊᖃᕐᓂᐅᔪᑦ ᐅᖓᓯᒃᑐᒥᑦ ᐃᒃᐱᒍᓱᖕᓂᕐᒧᑦ ᐊᑐᖅᑕᐅᔪᓂᒃ ᐃᓚᐅᓪᓗᑎᒃ ᖃᖓᑦᑕᖅᑎᑕᐅᓯᒪᔪᒃᑯᑦ ᐊᔾᔩᑦ ᖃᐅᔨᓂᐊᕐᓗᒍ ᐳᔪᖃᑖᒃ ᐊᐳᑎᐅᑉ ᖄᖓᓃᑦᑐᑦ. ᐳᔪᖃᑖᖃᕐᓃᑦ ᐊᐳᑎᒥᑦ ᐊᓯᐊᙳᖅᓯᖃᑦᑕᖅᑐᖅ ᑕᒡᕙᙵᑦ ᖃᐅᒪᓂᕐᒥᑦ ᐋᖅᕿᒃᓯᓪᓗᓂ ᖃᓪᓕᐅᔪᒥᒃ ᐱᒃᑲᓐᓂᖅᑐᒥᒃ ᓯᕿᓂᐅᑉ ᖃᐅᒪᓂᖓᓂᑦ. ᐊᒃᑐᖅᓯᓂᖃᕈᖕᓇᖅᑐᖅ ᐊᐅᒃᐸᓪᓕᐊᓂᐅᑉ ᐱᐊᓚᑎᒋᓂᖓᓂᑦ ᐊᒻᒪᓗ ᐊᖏᑎᒋᓂᖓᓂᑦ ᐃᒪᙳᖅᑑᑉ ᐊᐳᑎᒥᑦ ᐊᐅᒃᐸᓪᓕᐊᔪᒥᑦ.
ᐱᓕᕆᔩᑦ ᐊᑐᖃᑦᑕᕐᒥᔪᑦ ᒪᓂᕋᒦᑦᑐᒥᒃ ᖃᐅᔨᓴᐃᔾᔪᑎᓂᑦ ᓲᕐᓗ ᐳᔪᖃᑖᖕᒥᑦ ᑲᑎᑦᑎᔾᔪᑎᓂᑦ, ᖃᐅᔨᓴᕈᖕᓇᕐᓗᑎᒃ ᖃᓂᑦᑐᒥᑦ ᐳᔪᖃᑖᒥᑦ ᐅᖓᓯᒡᕕᒋᓗᒋᑦ. ᓯᕗᓂᐊᓂᑦ ᐊᓯᖏᓐᓂᑦ, ᐃᓕᐅᖅᖃᐃᔪᖕᓇᓚᐅᖅᑐᑦ ᓇᐹᖅᑐᓄᑦ ᑲᑎᑦᑎᔾᔪᑎᓂᑦ. ᑭᓯᐊᓂ, ᓇᐹᖅᑐᖃᙱᑎᓪᓗᒍ ᐅᑭᐅᖅᑕᖅᑐᒥᑦ, ᐋᖅᕿᒃᓯᓚᐅᖅᑐᑦ ᐱᖓᓱᓂᒃ ᓇᐸᔪᖃᖅᑐᓂᒃ ᑲᑎᑦᑎᔾᔪᑎᓄᑦ ᐃᓕᓯᕝᕕᖕᓂᑦ. ᑲᑎᑦᑎᔾᔪᑏᑦ 17-ᓄᑦ ᐃᓂᐅᔪᓄᑦ ᐃᓕᔭᐅᓚᐅᖅᑐᑦ ᐅᐊᖕᓇᖅᐸᓯᖓᓄᑦ ᐱᖓᖕᓇᖅᐸᓯᖓᓄᑦ ᕿᑭᖅᑖᓗᖕᒥᑦ. ᐊᒻᒪᓗ ᐱᓕᐸ ᐅᖃᖅᑐᖅ, “ᑲᑎᑦᑎᔪᑦ ᐳᔪᖃᑖᖕᒥᑦ ᒫᓐᓇ ᐃᒃᓯᕙᓪᓗᑕ ᐅᖃᓪᓗᕆᒃᓴᖅᑎᓪᓗᑕ.”
ᐃᓚᒋᔭᐅᔪᖅ ᖃᐅᔨᓴᖅᑕᐅᓂᖓ ᐊᐳᑎ ᐊᒻᒪᓗ ᐊᑐᖅᑕᐅᓂᖏᑦ ᐅᖓᓯᒃᑐᒥᑦ ᐃᒃᐱᒋᖃᑦᑕᖅᑐᑦ ᐊᒻᒪᓗ ᒪᓂᕋᕐᒦᑦᑐᑦ ᐊᑐᖅᑕᐅᔪᑦ, ᑎᓴᒪᒋᔭᐅᔪᖅ ᐊᑐᖅᑕᐅᔪᖅ ᐆᒃᑐᕋᖅᑕᐅᓂᐊᕐᓗᑎᒃ ᑕᒫᓂᖅᖠᖅᑐᑦ ᐳᔪᖃᑖᑦ ᖃᓄᑎᒋᐅᓂᖏᓐᓄᑦ ᐃᓚᐅᔪᑦ ᑲᑎᑦᑎᓗᑎᒃ ᐱᕈᖅᑐᓂᑦ ᐆᒃᑐᕋᐅᑎᓂᑦ, ᐳᔪᖃᑖᒃ ᑲᑎᑉᐸᓪᓕᐊᖃᑦᑕᕐᒪᑦ ᑐᒃᑐᓄᑦ ᓂᕿᒋᔭᐅᔪᓂᑦ ᐊᒻᒪᓗ ᐊᓯᖏᓐᓄᑦ ᐱᕈᖅᑐᓂᑦ ᓄᓇᒥᑦ. ᐱᓕᕆᐊᕐᒥᑦ ᐃᓚᐅᔪᑦ ᐊᓯᖏᑦ ᐅᔭᕋᒃᑕᕆᐊᓕᕆᔨᒃᑯᑦ ᖃᐅᔨᓴᐃᖃᑦᑕᕐᓂᖏᓐᓄᑦ ᐊᕐᕌᒍᑕᒫᒃᑯᑦ ᐃᓚᒋᔭᐅᓪᓗᓂ ᐅᔭᕋᒃᑕᕆᐊᒃᑯᑦ ᐊᕙᑎᒥᒃ ᖃᐅᔨᓴᐃᖃᑦᑕᕐᓂᖓᓄᑦ. ᑕᒪᐃᓐᓅᖓᔪᒃᑯᑦ, ᐊᔾᔨᒌᙱᑦᑐᓂᒃ ᐱᓕᕆᐊᖃᖅᑐᓄᑦ ᐊᑐᖅᑕᐅᔪᖅ ᐃᑲᔪᕐᓂᐊᖅᑐᖅ ᐊᑐᖅᑕᐅᓂᐊᖅᑐᒥᒃ ᐳᔪᖃᑖᖕᒥᑦ ᖃᐅᔨᓴᐃᓂᕐᒧᑦ ᐊᑐᖅᑕᐅᖃᑦᑕᖅᑐᓂᒃ ᓈᒻᒪᒃᑑᓗᓂ ᐅᑭᐅᖅᑕᖅᑐᒥᑦ ᖃᓄᐃᖓᓂᐅᔪᓄᑦ. ᖃᐅᔨᔭᐅᔪᑦ ᐊᑐᖅᑕᐅᔪᓂᑦ ᐱᔭᐅᔪᓂᑦ ᕿᒥᕐᕈᔭᐅᔪᑦ ᑕᑯᑦᑎᐊᕐᓂᖅᓴᐅᓂᐊᕐᓗᒋᑦ ᐊᒡᔭᖅᑕᐅᓂᖏᑦ ᐊᒻᒪᓗ ᓇᒧᙵᐅᓂᖏᑦ ᐳᔪᖃᑖᒃ ᖃᓂᑖᓃᑦᑐᓄᑦ.
ᑲᒪᒋᖃᑦᑕᕐᓗᒋᑦ ᑕᒪᕐᒥᓗᒃᑖᖅ ᐃᓂᐅᔪᑦ ᐊᔪᕐᓇᙲᓇᕈᖕᓇᙱᑦᑐᖅ, ᐱᓗᐊᖅᑐᒥᑦ ᐅᑭᐅᒃᑯᑦ. ᓄᓇᓕᖕᒥᑦ ᓇᒧᙵᐅᑎᑦᑎᔩᑦ ᐊᑐᖃᑦᑕᖅᑕᖏᑦ ᖃᐅᔨᒪᓂᕆᔭᖏᑦ ᐊᒻᒪᓗ ᐊᔪᙱᓐᓂᕆᔭᖏᑦ ᐃᓂᐅᔪᑦ ᐊᐅᓛᑦᑎᐊᖏᓐᓇᕐᓂᐊᕐᓗᑎᒃ.
ᐊᑕᐅᑦᑎᒃᑯᑦ ᐱᓕᕆᐊᖃᕐᓂᖅ
ᐱᓕᕆᐊᕆᖃᑦᑕᕐᓗᒋᑦ ᖃᐅᔨᓴᐃᓂᕐᒧᑦ ᐊᑐᖅᑕᐅᔪᑦ ᐊᖏᔫᑉᓗᓂ ᐱᓕᕆᐊᒃᓴᐅᔪᖅ, ᐊᒻᒪᓗ ᐱᓕᕆᖃᑎᒌᖕᓂᖃᕆᐊᖃᖅᑐᑦ ᐱᓕᕆᐊᖅ ᐱᐊᓂᑦᑎᐊᖅᓯᒪᓂᐊᕐᓗᓂ. ᐱᓕᕆᖃᑎᒋᑉᓗᒋᑦ ᓄᓇᓕᖕᒥᑦ ᓇᒧᙵᐅᑎᑦᑎᔪᑦ ᒥᑦᑎᒪᑕᓕᖕᒥᐅᑕᐃᑦ ᐱᒻᒪᕆᐅᒋᑦᑎᐊᖅᑕᖓᑦ ᐱᓕᐸᐅᑉ ᐊᒻᒪᓗ ᐲᑕᐅᑉ, ᑕᐃᑲᓃᖏᓐᓇᕐᓂᖅ ᐊᔪᖃᑦᑕᖅᑎᓪᓗᒋᑦ. ᐳᔪᖃᑖᓂᒃ ᑲᑎᑦᑎᔾᔪᑎᓄᑦ, ᐊᐅᓚᑕᐅᔪᑦ ᓄᓘᔮᓂᑦ ᐅᔭᕆᐊᒃᑕᕆᐊᓕᕆᔨᒃᑯᑦ ᐊᕙᑎᓕᕆᔨᒃᑯᖏᓐᓄᑦ ᐊᒻᒪᓗ ᓄᓇᓕᖕᒥᑦ ᓇᒧᙵᐅᑎᑦᑎᖃᑦᑕᖅᑐᑦ ᒥᑦᑎᒪᑕᓕᖕᒥᐅᑕᐃᑦ, ᐊᔪᕈᖕᓃᖅᓴᖅᑕᐅᖃᑦᑕᖅᑐᑦ ᐊᒻᒪᓗ ᐅᖃᐅᔾᔨᔭᐅᑉᓗᑎᒃ ᐲᑕᒧᑦ ᐊᒻᒪᓗ ᐱᓕᐸᒧᑦ ᐱᓕᕆᖃᑎᒋᔭᐅᔪᓂᑦ. ᓄᓇᓕᖕᒥᑦ ᐃᑲᔪᖅᑕᐅᓂᖏᑦ ᐳᔪᖃᑖᖕᒥᑦ ᖃᐅᔨᓴᐃᔾᔪᑎᓂᑦ ᐱᓕᕆᐊᖑᑎᑦᑎᑐᐃᓐᓇᙱᑦᑐᖅ ᐊᒻᒪᓗ ᐆᒃᑐᕋᕈᑕᐅᔪᑦ ᐊᐅᓪᓚᖅᑎᑕᐅᖃᑦᑕᕐᓂᖏᑦ ᖃᐅᔨᓴᐃᕝᕕᖕᒧᑦ, ᑭᓯᐊᓂᑦᑕᐅᖅ ᐱᓕᕆᕝᕕᐅᔪᒥᑦ ᖃᐅᔨᒪᓂᕆᔭᐅᔪᑦ ᐊᒻᒪᓗ ᐊᑐᖅᓯᒪᓂᑯᒋᔭᐅᔪᑦ ᐃᓚᐅᑎᑕᐅᔪᑦ ᐊᖏᓂᖅᓴᐅᔪᒃᑯᑦ ᐱᓕᕆᐊᕐᒧᑦ.
ᐊᑐᑦᑎᐊᖅᑐᖅ ᖃᐅᔨᓴᐃᓂᕐᒧᑦ ᑕᑯᒃᓴᐅᑎᑕᐅᓂᖏᑦ ᓄᓇᓕᖕᒥᑦ ᐱᕙᓪᓕᐊᑎᑦᑎᖃᑕᐅᔪᑦ ᐊᒻᒪᓗ ᐃᓚᐅᖃᑕᐅᔪᑦ. “ᓄᓇᓕᖕᒥᐅᑕᐃᑦ ᖃᐅᔨᒪᔭᖓᑦ ᓄᓇ,” ᐅᖃᖅᑐᖅ ᐱᓕᐸ. “ᑕᒪᐅᙵᐅᔾᔨᔪᒍᑦ ᖃᑉᓗᓈᓃᑦ ᖃᐅᔨᓇᓱᒃᑐᓕᕆᓂᒃᑯᑦ ᖃᐅᔨᒪᓂᕆᔭᐅᔪᒥᒃ, ᑭᓯᐊᓂ ᐊᑐᖅᑐᒍᑦ ᐃᓚᐅᖃᑕᐅᓂᖏᓐᓂᑦ ᓴᖅᕿᑦᑎᓂᐊᕐᓗᑕ ᐊᒃᑐᖅᓯᓂᖃᖅᑐᒥᒃ ᖃᐅᔨᓴᐃᓂᕐᒧᑦ ᑐᕌᖓᔪᒥᑦ ᐃᑲᔪᐃᓂᖃᖅᑐᒥᒃ ᑭᑐᓗᒃᑖᓂᒃ.”
ᐱᓕᕆᐊᖅ ᐃᑲᔪᖅᑕᐅᔪᖅ ᓄᓘᔮᓄᑦ, ᓇᖕᒥᓂᖅ ᐳᔪᖃᑖᖕᒥᑦ ᖃᐅᔨᓴᐃᓂᕐᒧᑦ ᑐᕌᖓᔪᖃᖅᑐᑦ. ᐊᑕᐅᑦᑎᒃᑯᑦ ᐱᓕᕆᖃᑎᒌᒡᓗᓂ, ᓄᓘᔮᒃᑯᑦ ᐊᒻᒪᓗ NRCan−ᑯᑦ ᑐᕌᒐᖃᖅᑐᑦ ᑐᑭᓯᐊᓂᖅᓴᐅᔪᒪᓪᓗᒋᑦ ᐊᔾᔨᒌᙱᑦᑐᑦ ᖃᐅᔨᓴᐃᓂᕐᒧᑦ ᐊᑐᖃᑦᑕᖅᐸᑕ ᐱᔭᐅᔪᑦ ᓈᓴᐅᑏᑦ/ᑎᑎᖅᖃᐃᑦ ᐊᔪᙱᓐᓂᖅᓴᐅᓂᐊᕐᒪᖔᑕ. ᑕᒪᐅᙵᖅᐸᑕ, ᐊᑐᖅᑕᐅᖃᑦᑕᖅᑐᑦ ᖃᐅᔨᓴᖅᑕᐅᔪᖕᓇᖅᑐᑦ ᐊᒥᓲᓂᖅᓴᓄᑦ ᐊᑐᖅᑕᐅᔪᖕᓇᕐᓂᐊᖅᑐᑦ ᐅᔭᕋᒃᑕᕆᐊᓕᕆᔪᓄᑦ ᐊᒻᒪᓗ ᐱᖁᑎᖃᕐᕕᐅᔪᓂᑦ ᑲᓇᑕᒥᑦ ᐅᑭᐅᖅᑕᖅᑐᒥᑦ.
ᒫᓐᓇᐅᔪᒥᑦ, ᓈᓴᐅᑎᓂᒃ/ᑎᑎᖅᖃᓂᒃ ᑲᑎᑦᑏᓐᓇᖅᑐᑦ ᐊᒻᒪᓗ ᖃᐅᔨᓴᐃᓪᓗᑎᒃ, ᐱᕙᒌᔭᐅᑎᖃᖅᖢᑎᒃ ᐱᓕᕆᓂᐅᒃᑲᓐᓂᕐᓂᐊᖅᑐᓄᑦ ᐊᕐᕌᒎᓂᐊᖅᑐᒥᑦ. ᐊᑯᓂᐅᔪᒥᒃ ᖃᐅᔨᓴᐃᓂᖅ ᑐᑭᓯᐊᓂᖃᖅᑎᑦᑎᓂᖅᓴᐅᓂᐊᖅᑐᖅ ᐳᔪᖃᑖᒃ ᖃᓄᐃᓕᐅᖅᐸᓪᓕᐊᓂᖓᓄᑦ ᐅᑭᐅᖅᑕᖅᑐᒥᑦ ᐊᒻᒪᓗ ᐃᑲᔪᕐᓗᓂ ᐲᑕᒥᑦ, ᐱᓕᐸᒥᑦ ᐱᓕᕆᖃᑎᒋᔭᖏᓐᓂᓪᓗ ᐱᐅᓯᒋᐊᒃᑲᓐᓂᕐᓂᐊᕐᓗᒍ ᐅᑭᐅᖅᑕᖅᑐᒥᑦ ᖃᐅᔨᓴᐃᓂᕐᒧᑦ ᐊᑐᖅᑕᐅᖃᑦᑕᖅᑐᑦ.
ᐱᓕᕆᐊᖃᕐᓂᖅ ᐅᑭᐅᖅᑕᖅᑐᒥᑦ ᐊᒃᓱᕈᕐᓇᕐᓂᐅᔪᓂᒃ
ᐱᓕᕆᖃᑎᒌᖕᓂᖏᑦ ᖃᐅᔨᓴᐃᔩᑦ, ᐱᓕᕆᕝᕖᑦ ᐊᒻᒪᓗ ᓄᓇᓕᖕᒥᐅᑕᐃᑦ ᐱᒻᒪᕆᐅᔪᖅ ᐱᓕᕆᐊᕆᓂᐊᕐᓗᒋᑦ ᐊᔾᔨᐅᖏᑦᑐᑦ ᐊᒃᓱᕈᕐᓇᖅᑐᑦ ᐱᑎᑕᐅᔪᑦ ᐳᔪᖃᑖᖕᒥᑦ ᖃᐅᔨᓴᐃᓂᕐᒧᑦ ᐅᑭᐅᖅᑕᖅᑐᒥᑦ, ᐊᒻᒪᓗ ᐃᓱᒪᒋᔭᖏᑦ ᐃᓄᐃᑦ ᐊᒃᑐᖅᑕᐅᓂᖃᓛᖑᔪᑦ ᐃᓚᐅᑎᓪᓗᒋᑦ ᖃᐅᔨᓇᓱᒃᑐᓕᕆᓂᕐᒧᑦ ᐊᒻᒪᓗ ᐃᓱᒪᒋᔭᖏᓐᓂᑦ ᑐᓂᓯᖃᑦᑕᐅᑎᓂᕐᒧᑦ.
ᐱᓕᕆᖃᑎᒌᖕᓂᒃᑯᑦ ᐊᒻᒪᓗ ᓄᑖᐅᔪᓕᕆᓂᒃᑯᑦ, ᐲᑕ ᐊᒻᒪᓗ ᐱᓕᐸ ᓯᕗᒻᒧᒃᓯᑎᑦᑎᔪᒪᔪᑦ ᐃᓚᐅᑎᑦᑎᓗᒃᑖᖅᑐᒥᑦ ᐊᒻᒪᓗ ᐊᔪᙱᑦᑐᒥᒃ ᖃᐅᔨᓴᐃᓂᕐᒧᑦ ᐊᑐᖅᑕᐅᖃᑦᑕᖅᑐᓂᒃ ᐊᒥᓱᓂᑦ ᐊᔾᔨᒌᙱᑦᑐᓂᑦ ᐊᕙᑎᖃᖅᑐᓂᑦ ᐊᒻᒪᓗ ᐃᑲᔪᐃᓂᐊᖅᑐᓂᒃ ᐊᒥᓱᓂᒃ ᐃᓄᖕᓂᑦ ᐊᒥᓱᐃᑦ ᐊᑐᖅᑕᐅᔪᖕᓇᖅᑐᑎᒍᑦ.
ᖃᐅᔨᒃᑲᓐᓂᕆᑦ:
ᑲᑎᑎᑕᐅᓂᖏᑦ ᐱᖅᖁᓯᕆᔭᐅᔪᒃᑯᑦ ᐊᒻᒪᓗ ᖃᐅᔨᓇᓱᒃᑐᓕᕆᓂᒃᑯᑦ ᖃᐅᔨᒪᓂᕆᔭᐅᔪᒥᑦ ᑐᒃᑐᔭᖅᑐᕐᒥᑦ
ᖃᐅᔨᓴᐃᓂᖅ ᐅᑭᐅᖅᑕᖅᑐᒥᑦ (ᓄᓇᒥᑦ ᐱᔪᓄᑦ ᐃᓚᒋᔭᐅᔪᑦ)