Tuhaajakhat
Tuhaqtitaunariqtukhaq
Qiqaijaluarvia 19, 2026 — Kapihiliktuuq, Nunavut — Nunamiittutuqat Piqutit Kanatami
Tadja nunarjuami nalunarningani, Kanata ihumagilluaqtait hunanik munarittaaqtaptingnik: piliurnikkut angijunik hunanik angmaqtirnikkullu nunamin piqutinik iharianaitkutikhanik. Kanatap Tununngani Ukiuqtaqtunilu avikturningit angijunik ujarakhiuqtauvaktun angijuniglu piniarungnaqhijunik piangaijarnikkut angigliharnikkut mamiharnirnullu, taapkuallu pidjutiulluaqtun atanniqtuidjutiptingnun Kanatamilu hapummidjutiptingnun.
Ublumi, angijuq quviahuut haffumunga Kanatap Ukiuqtaqtuanun, Nanngarijaujuq Tim Hodgson, Minista Auladjutini Nunamiittutuqanilu Piqutini, ilaujuq nunamik algujaqtuqtut quviahuutaanun havaktauffaangnianun haffuma Kapihiliktuumi Havaakhaq Nunavunmi. Minista tunngahuktitaa tuhaqtidjutaa Agnico Eagle Mines Limited (Agnico Eagle) avatquhimajumik $2-biliantaala maniliqtuutikhamik angirutimik nappaqtirutikhaanun ujarakhiurvingmik, taamna parnaqutikhakkut anginiqaqtuq Kanatamun. Kapihiliktuumi Ujarakhiurvik niriuktaujuq amigairjuumilugit Kanatap aulaqtitaujut imaa $2.6 biliantaalamik atauttini ukiuni uvvalu ikajuutaulutik naamavjaktuq 2,000 havaakhat, tunihiblutiglu angijumik maniliurnikkut ikajuutinik Nunaqaqqaaqtunun katimajinun uvvalu ilagiinun, ilaujut ukua Kitikmeot Inuit Katimajiit.
Angmaqtiriami tamaat pittaarninga Ukiuqtaqtumi pipkailunilu Kanata hivuliqtiuhimmaarluni aularaanginnaqtuni ujarakhiurnikkut, kavamatuqatkut maniliqtuliqtaillu nutaanik auladjutikkut aulapkaidjutikhanik Ukiuqtaqtumi, talvani amigaittun nunallaat atuqhimmaaqpaktait uqhurlungnik pauwatuutikhanun, taamna halumaitqijaujuq akitutqijaujurlu aallanin auladjutikkut pidjutinin. Piliurniq nutaanik halumajunik auladjutikhanik pipkainiaqtuq munarittiarutikhanik piqutinik pivallialiurnirmik, hakugikhijuummiqtirnikkut auladjutikhanik piqarnaittumik, pimmarikharlugillu akituvallaangittunik Ukiuqtaqturmiutanun huli ikajuqhugit nunallaani havaakhat piangaijarnikkullu naudjutikhanik.
Nungunianun, Minista Hodgson tuhaqtittijuq $25 miliantaalamik kanatamin maniliqtuinirmik haffumunga Kapihiliktuumi Anurikkut Havaakhaq, najugaa uvani Kapihiliktuumi ujagakhiurviani. Hivulliuqtaujuq Inungnin-nanminirijaujunin aulapkaqtitaujurlu Kitikmeot Tugliq Limited Partnership (KTLP), una havaktaujukhaq ilaliutiniaqtuq 4.2 megawatts-nik anurimit pauwaliurutikhanik imaalu 4 megawatts-nik baatuliimik tutquumavikhamik ujarakhiurviup tahamaniittumun pauwatuutikhanun, tuniluni halumatqijaujunik pauwaliurutikhanik mikhilaaqtirnikkullu uqhurjuanik aturnirnik taimaatun Kapihiliktuumi nappaqtilirutaani aulapkaidjutaanilu. Taamna Kapihiliktuumi Anurikkut Havaakhangit ikiglijuumiqtittiniaqtun uqhurjuaqtuqtunik atugianganik 3 milian liitaanik ukiuq tamaat unalu pujuum anialailaqutaa anianiit taimaa 8,000 taans uqumaitilaanga ukiuq tamaat, aadjikiiktumik taimaa 1,800 hananik akhaluutinik apqunmiingitkumik ukiuq tamaat.
Pidjutigiblugu Nanngarijaujuq David J. McGuinty, Minista Kanatami Angujaktini, Minista Hodgson uqaqturlu nutaamik havaqatigiingnikkut angirutimik ukunani Kanatami Angujaktiinni (DND) ukuallu Agnico Eagle-kut pipkainikkut qaujihimanikkut nuutirnikkut uukturvikhanik.
Haffumuuna ihuarnikkut upautiniq havaqatigiingnikkut havagvigjuanun, DND piniaqtut tautuktuumijaaqtamingnik tunihinikkut angijunik igluqpanikkut havaakhanik Ukiuqtaqtumi uvvalu uqautigilugit Ukiuqtaqtumi havaannikkut ajuqhautit, taimaalu Kanatami Angujaktit amigairjuumilugit inmi tahamaniidjutait uvvalu upalungaiqhimalutik avikturniani munarijaangani Kanatap Ukiuqtaqtumi ataniudjutaa.
Ublumi tuhaqtidjutit naunaijaqhimajut angijut pijakhat Ukiuqtaqtumi ujarakhiurnikkut, halumajumik auladjutinik, Kanatami annaktuinikkut uvvalu Kanatami atanniudjutaanun, uvvalu maniliurnikkut angiglivallianiq uvvalu iharianaitkutikhaq. Kinguani pingahut qulit ukiut qiniqhiajut uvani Kapihiliktuumi, pualgitit nunamungaliqtut – naunaitkutaujuq nutaamun igluqpinirmun aularutiliqtugut Kanatami.
Uqauhiit
“Kanatamiut uqautigivaktaat angijumik piniarungnaqhijuq Kapihiliktuumi ujaraktaakhaq 1990-nginnit – kihimi uqautigijakhaqqut nunguttuq, nappaktirijukhannguqtuq. Kavamakput tunngahuktitaa pijumania uumani havaktaujukhami, quviahuktugullu ikajurumablugin pidjutilgit uukturvikhat ukununga tamangnun halumajunik auladjutikhanik pivallialiurnirnik ukunanilu auladjutikhani qajangnaidjutikhainnun, ukunanilu angummadjutikhanik piliurutikhanik Angujaktiptingnun. Ukiuqtaqtuq talvani nunamittutuqat piqarnit iharianarniq, Nunaqaqqaaqhimajut hivuliqtiit, Kanatami munariniq, manikhaqhiurutilu nauvallianiq iharianaitkutikharlu katitpaktut, qilamiurutigiguptigu akhuurutivut tamainnit havauhiujuni, nappaqtiqtaaqtaqqut Kanata Hakugiktuq – hananiaqtaqqut Kanata Hakugiktuq.”
Nanngarijaujuq Tim Hodgson
Minista Auladjutini Nunamiittutuqanilu Piqutini
“Nappaqtiriniq ihariagijaujunik nappaqtirutikhanik Ukiuqtaqtumi ukununga Kanatami Angujaktinun hivulliutijaunginnangittuq Angujaktiinnun, Kanatami pijukhaujuq. Ihariagijuq tautuktuujaaqtamingnik, ihumaliurniq, ajuirumanirlu tahapkunannga nakuujumik aulapkaijut ilanginni Kanatap akhuraaluk akhuurutaujuq avatingit. Una havaqatigiingnikkut angirut hapkununga Agnico Eagle Mines-kunnun pipkaqtiniaqtaatigut ajuirluta havagvigjuanin hivuliqhuqtunin uvvalu hivumuuqtilugu tunihiniq ihariagijaujut igluqpait taapkua pidjutauniaqtut Angujaktiita auladjutainun uvvalu qajangnautikkut pijakhait Ukiuqtaqtumi Tununnganirmilu.”
Nanngarijaujuq David J. McGuinty
Minista Kanatami Angujaktiinni
“Nunavut pidjutigijaaqtaa tadjamin kavamaliqinikkut avatingit, uvvalu pihimajukhaujugut aulahimaaqtumik turaaqhimaluni. Una tuhaqtidjut pidjutiqaqtuq mikhijuumirlugu ukhurjuaq aturniq akikhijuumiriangani auladjutit akiligakhat, piliurlutik ajuittiaqtunik nunamingni havaakhanik uvvalu havaglugit auladjutikkut auladjutit taapkua Inuit-hivuliqhuqtaujut nanminiqaqtut aulaniaqtut uvvalu pihimalugit hivitujumik igluqpiniq nungutpat. Taimaittut aktilaangit hakugikhijuumirutijut Nunavunmun hivitujumun uvvalu pidjutaujut Ukiuqtaqturmiut hivuliqhuqtiulutik Kanatap pivallianiranun, iharianaitkutikhaanun uvvalu munaridjutinun.”
Lori Idlout
Maligaliuqtit Maligaliurvigjuangat Nunavunmi
“Talvuuna iliqatigiirnikkut Tugliq Énergie-kunnik Kitikmeot Corporation hivutunikharnik Inuit hivulliqtikharnik pivalliadjutikharnik aallanik alrujaqtuutikharnik iglukharnik havaakhangit ikajuutiginiaqtun angijunik hanaqidjutikharnik pivalliadjutikharnik taimaittutun Agnico Eagle-kut Kapihiliktuumi ujaraqhiurviannik. Paannariiguti piliurniaqtuq nutaanik apqutikhanik Inuinnarnut havaakhanun ukunani aallanngajunik auladjutikhanik, niriuktugullu una atauhiuniaqtuq amigaittuni hivunikhaani aallanngajunik auladjutikhanik havaktaujukhanik pivallialiuqtaaqtavun Kapihiliktuumi tamaanilu aviktuqhimanirmi.”
David Omilgoitok
Angijuqaaq uvvalu Hivuliqtiujuq Aulattittinirmut Havakti, Kitikmeot Corporation
“Tugliq quviahuktut havaqatigiblugit Kitikmeot Corporation ukuallu NRCan-kut havaakhamut taimaatut amigaigjuumijut kiglikhainik atutqiktaaqtut alrujaqtuutikhangit Ukiuqtaqtumi. Ilitarijumajavullu Agnico Eagle-kut hivulliurutait algunngup pujuannguqtirninganun, ikajuutauqpiaqtuq pipkainikkut uumani piniaqhimadjutimi Kanatap tununganitqijaujumi ujarakhiurvingni.”
Laurent Abbatiello
Hivuliqtiujuq Aulattittinirmut Havakti, Tugliq Énergie
“Kanatap Kavamanga hakugiktumik akhuurutigijait aullaqtipkainikkut havaktaujukhanik Kanatami anginiqaqtunik, taapkuat pipkaivaktun piangaijarnikkut naunirnik huli hakugikharnikkut pidjutainnik nunaptingni. Taamna Kapihiliktuumi Havaakhaq aturuminaqtuq tautuktittihimaaqtuq, akhuuqhaidjutikharnik Kanatam Ukiuqtaqtumik aulapkaidjutikharnik hanaqidjutikharnik auladjutikharnik talvuuna pivalliadjutikharnik ujaraqhiuqtunik hanaqidjutikharnik, ikajuutikharnik tunnganirmi nunallaangit, aulatittijaangat ihuaqtumik havaakharnik, hivutunikharnik Nunaqaqqaaqhimajunik ihuaqhaidjutikharnik tautuktitihimaaqhutiglu Kanaitian hivuliqtikharnik talvuuna qilaminnuaq aallannguqtiqhimaaqtunik nunarjuaptingni nunagijainik. Taimaa angitqijaujuq nanminiqaqtunik havaktittijunik Nunavunmi, Agnico Eagle ilitarihimajut taimaa, talvuuna aulahimaaqtunik havaqatigiiktukharnik, una havaakhaq aittuihimaarniaqtuq hivutunirmik pidjutikharnik Inuit nunallaanginni taimaa aulahimaaqtilunik nunaptingnik pitquhiliqinikkut upirijainik, avatiliqinikkut munaridjutikharnik maniliurutikharnik piumaluaqtainik.”
Sean Boyd
Ikhivautalik Katimajiit, Agnico Eagle Mines Limited
Kajumiktut Naunaiqhitit
- Kavamatuqatkunnin maniliqtuutikhat uumunga Kitikmeot Tugliq Énergie-kut Kapihiliktuumi Anurikkut Havaakhaq tunijaujuq Kanatap Kavamangata Ajurnaittuq Aularaanginnaqtun Alrujaqtuqtukkullu Apqutikhat Pinahuarutiinnin (SREPs). Una $4.5-biliantaalamik pinahuaruti ikajuqtaa aullaqtirninganun alrujaliqidjutikkut nutaannguqtirnikkut havaktaujukhanik, auladjutikhanik tutquumavikhanik, ukuallu hiamittingittunik pauwaliurutinik tamainnit aviktuqhimanirni Kanatami, ikajuqhuni angigliharnikkut pauwaliqidjutimik aularaanginnaqtumik, akittuvallaangittumik, nakuujumiglu pidjutimik.
- Taamna pinahuaruti ikajuutiginiaqtun Nunaqaqqaaqhimajunik nanminikharnik, taimaa 50 pusanmik angirutiqaqtunik auladjutikharnik havaakhangit ublumimun piqaqtun Nunaqaqqaaqhimajunik nanminirijainik.
- Qiqaijaluarvia 14-mi, Kanatap Kavamanga aullaqtittijut nutaamik Kanatami Alrujaqtuutikkut Qanuriliurutikhami. Una upalungaijaut malruiqturlugu aktilaanga alrujaqtuutiptingnun hamunga 2050-mun uvvalu tunihiluni halumajumik, aturuminaqtumik, uvvalu akiliguminaqtumik auladjutinik avatiini nunarjuap amigaittuni ukiuni qaijuni.
- Piliuriami uuminnga Qanuriliurutikhamik, kavamatuqatkut aullaqtiliqtaa miitiqatigilugin aviktuqhimanirni, ukiuqtaqtuni, Nunaqaqqaaqhimajuni Inungni, pauwaliqidjutainnun, havaktinullu ikajuqtiinnun havaqatigiiglutik naunaijarnikkut hulidjutikhanik ihariagijaujun malruiqturiami pauwaliqidjutiptingnik nakuutqijaujumik akittuvallaangittumiglu.
Ilaujut Atadjutit
- Kitikmeot Corporation
- Tugliq Énergie Co
- Ajurnaittuq Aularaanginnaqtun Alrujaqtuqtukkullu Apqutikhat Pinahuaruti
- Pauwaqtipkainikkut Kanatami Hakugiktumik: Kanatami Qanuriliurutikhaq uumunga Alrujaqtuqtukkut Kanatami Piangaijarutikhanun
Uqarvikhat
Nunamiittutuqat Piqutit Kanatami
Tuhaqtittijit Havaqatait
343-292-6096
media@nrcan-rncan.gc.ca
Charlotte Power
Havagvia Ministap Auladjutini Nunamiittutuqanilu Piqutini
Charlotte.Power@nrcan-rncan.gc.ca
Maliglugit Nunamiittutuqat Piqutit Kanatami uvani LinkedIn.